جحـــــــــــــــــــــــا
شعور سخيف انك تحس بأن وطنك شيئ ضعيف
صوتك ضعيف - رائيك ضعيف
انك تبيع قلبك وجسمك وانك تبيع قلمك واسمك ميجيبوش حق الرغيف
سألو جحا عن سر ضحكو
قالك اصل اتنين وشبكو
اللى كان من تحت مايت واللى كان من فوق كفيف
ده شعور سخيف
وشعور سخيف انك تكون رمز الشحاته
تبنى مبنا للشحاته تعمل وزاره للشحاته
يا ساقيه دورى عدى فوقى ودوسى
نصبوا عليا وشحتونى فلوسى
ربطونى فيكي حتى ما اتغميت
هما اللى فرحوا و وحدى انا اتغميت
انا اللى صاحب البيت عايش بدون لزمه
ولما مره شكيت ادونى بالجزمه
مش لاقى تطفح اديك
هاتولنا وجيبولنا و ادونا هنجيب منين نديك
مش لاقى تطفح اديك
طافح يا بلدى غدايه ولوعتى غدايه
وادى الاحبه التقوا واتجمعوا عدايه
انا اللى زرعك دهب بتأكليني اسباخ
ما ان كان ده تقل ودلع بذياده دلعك باخ
لا شوفت فيكي هنا ولا شوفت فيكي ترف
كل اللى فيكي قرف
كرامتنا متهانه واللقمه بأهانه
بتخلفينا ليه لما انتى كرهانه
يعنى ايه تبقى انتى هبة النيل يا بوبه........ وكل يوم المايه تقطع
يعنى ايه لما اشتكى غلو الفتوره.............. يقولوا تشكى بس تدفع
لما قش الرز ثروه بتتحرق
واما نفط الامه ثروه بتتسرق
واما جلادك على ولادك بيبطش
واما علمك ميلاقيش ياكل فيطفش
يعنى ايه نرفع ايدينا بالسلام لاجل الغزاه
ويعنى ايه لما ابقى ماشى فى حالى اتشد اشتباه
يعنى ايه لما انحبس اربع سنين حبس احتياطى
حبس اعتباطى
يعنى ايه مش حاسه بالعمر وغلاوته
بتصبى مر العمر ليه ده انا كنت حوهبلك حلاوته
انا عمرى ما اتأمرت ولا حطيت شروطى
ومكان ما ترسى مركبك ببنى شطوطى
انا كنت جيشك لما مماليكك باعوكى
وكنت يوسف لما عشت سنين عجاف
وضلوعى دى اللى فى معركة قادش حموكى
وشفايفى دى اللى مبطلتش فى يوم هتاف
انا كل شبر فى ارضك اتمرمغت فيه
وكل يوم عشتيه انا اتعذبت بيه
بتكرهيني عيونك السوده وايامى اللى فاتت
منتيش حبيبتى من انهارده حبيتى ماتت
مع صوت ادانك جرس فى الشده صحينلك
من امتى كانوا الحرس هما اللى بقينلك
بعتيني علشانهم وعنيكي معصوبه
يا هل ترى خاينه ولا زيي مغصوبه
كل الكلام اتقال والشعر بقى ماسخ
والصبر علو جبال والظلم شيء راسخ
وطن وغرقان فى النطاعه
كل شيء ريحتو نطاعه
علمونا بالعصايه ورضعونا الخوف رضاعه
علمونا فى المدارس يعنى ايه كلمة قيام
علمونا نخاف من الناظر فيتمنع الكلام
علمونا ازاى نخاف وازاى نكش
بس نسيوا يعلمونا الاحترام
فمتزعلوش لما ابقى مش بسمع كلامكم
مستنى ايه من طفل ربوه بالزعاق غير المشاكل والخناق
كل اللى بيقولك بحبك دول نفاق
انا لما قولتلك بحبك كان نفاق
الحب يعنى اتنين بيدوا
مش ايد بتبنى و600 تيت تيت يهدوا
الحب حاله ..... الحب مش شعر وقواله
الحب يعنى براح فى قلب العاشقين للمعشوقين
يعنى الغلابه يناموا فى الليل دفيانين
الحب يعنى جواب لكل المسجونين
هما ليه بقوا مسجونين ؟
يعنى اعيش علشان هدف علشان رساله
يعنى احس بقيمتى فيكي انى مش عايش عواله
يعنى لما اعرق تكافئيني بعداله
الحب حاله الحب مش شعر وقواله
الحب حاجه متتوجدش فى وسط ناس بتجيب غداها من صناديق الزباله
الحب جواكى استحاله
ليست هناك تعليقات:
إرسال تعليق